Bolaga telefon berish oqibatlari.

Bolalarning miyasi elektron qurilmalar ta'siriga nihoyatda sezgir ekanligini bilasizmi? Hozir dunyo bo'ylab bolalarga keng miqiyosda qo'yilayotgan nevroz, nutq muammolari, rivojlanishning sustlashishi kabi tashhislarning negizida zamonaviy hayot tarzimizga kirib kelgan planshetlar, telefonlar sabab bo'lmoqda.

Bir qarashda bunday muammo umuman tug'ilishi kerak emasdek. Chunki, jajji go'dak uchun bunday qurilmalarning umuman keragi yo'q. Ammo, qurilmalarga tobe'likni ota - onalarning o'zlari namuna sifatida bolaga ko'rsatyaptilar. Nonushtada tonggi yangiliklarni bilish uchun "birrov" internetga mo'ralash, ijtimoiy tarmoqlardagi surat yoki videolarni ko'rmasdan tura olmaslik, Ko'chaga bola bilan chiqqanda mavjud muammolarni telefonda go'yoki hal qilish....

Dunyoga kelgan go'dak umrining 1-soatidanoq yaqin o'rtog'i smartfon bilan tanishib olyapti. Yaqinlari bilan xursandchilikni baham ko'rishni istovchi yosh ota - onalar bola tug'ilishi bilan fotosessiyani boshlab yuboradilar.

Biz g'orlarda yashamaymiz va zamonaviy qurilmalarga har doim ehtiyoj sezamiz. Ammo biz bolani smartfon bilan do'stlashtirar ekanmiz, me'yorni belgilash va bolani nazoratga olishni unutmasligimiz kerak.

1 - SALBIY TA'SIR: Vitual o'yinlarni faol o'ynash jarayonida Inson organizmida Dopamin miqdori ortadi, buning natijasida bola o'zini baxtli va xotirjam his qiladi. Bunday o'yinlarni ko'p o'ynayvergan bola halovatini yo'qotadi, unda sababsiz xavotirlar paydo bo'ladi, natijada faqatgina qo'lida o'yin o'ynash qurilmasi bo'lsagina xotirjam va quvnoq bo'la oladi. Bu psixologik tobe'lik vaqt o'tishi bilan jiddiy kurashish kerak bo'lgan muammoga aylanadi. Bolada bu kabi muammo bo'lganda, bolaning o'zini tutishi kayfiyati va xarakteri beqaror bo'ladi. Bola haddan tashqari faol, yoki aksincha, o'ta loqayd va befarq bo'lib qoladi.

2 - SALBIY TA'SIR: Nutqdagi muammolar - bola duduqlanib gapiradigan yoki gapirishga qiynaladigan bo'lib qoladi.

3 - SALBIY TA'SIR: Shovqinli kalonkalar, quloqchinlar eshitish tizimi va asab tolalariga jiddiy zarar yetkazadi.

4 - SALBIY TA'SIR: Bir nuqtaga uzoq vaqt qarash - ko'zning charchashiga va ko'rish qobiliyatining sustlashishiga olib keladi.

5 - SALBIY TA'SIR: Suyaklari o'sib rivojlanayotgan bola chopqillab o'ynash o'rniga uzoq vaqt bir joyda o'tirishi, qaddi qomatning noto'g'ri shakllanib o'sishiga va yosh bolalarda umurtqa bilan bog'liq kasalliklar yuzaga kelishiga sabab bo'ladi.

O'zingiz ham zarurat bo'lmasa telefonga qarayvermang. Telefon va qurilmalarni bir qutiga yig'ib berkiting va farzandingiz so'raganida - telefonlar oilasi charchab ketib dam olgani ketishganini ayting - misol qilib hech kimda telefon yo'qligini ular rostdan ham ketganini tushuntiring. 5-6 yoshgacha bo'lgan bolalar bu gapga ko'pincha ishonadilar. Ishontira olish esa ota - onaning aktyorlik mahoratiga bog'liq. Shunday qilib haftada 1 kun telefonsiz kun tashkil qiling. Demak o'shanda ham siz, ham farzandingiz telefon va qurilmalardan dam olasizlar.

O'yinlar nafaqat bolangizni elektron o'yinlardan chalg'itadi, balki ota ona va farzand o'rtasidagi oilaviy munosabat rishtalarini mustahkam bog'lovchi vositadir. Bola yoshiga qarab ijodiy o'yinlar - qo'g'irchoq teatri, shaxmat - shashka, yengil sport o'yinlari tashkillashtirishingiz mumkin.

Farzandingizdan uy yumushlarini bajarishda yordam so'rang, hamda bu ishni u hammadan yaxshi qilishini ayting. Uyda doimiy vazifalari bo'lgan va doimo ota onasiga yordamlashadigan bolalar ulg'ayganida mas'uliyatli, o'ziga ishongan hamda mustaqil odamlar bo'lishi butun dunyo tajribasidan o'tgan.

Sayr qilganda tabiatdagi o'zgarishlar, atrofdagi voqealar haqida suhbatlashing. Bolani sayrga olib chiqish yaqinlaringiz yoki tanishlaringiz bilan telefonda suhbatlashib olish fursati emasligini unutmang. Har bir savoliga javob bering va o'zingiz ham savollar bering. Buning natijasida farzandingizda siz bilan suhbatlashish va maslahatlashish ko'nikmasi shakllanadi. Stress mahali qanaqadir virtual qurilmalarga emas ota - onasiga suyanishi mumkinligini his qiladi.

Bolalar rasmli rangbarang kitoblarni juda yaxshi ko'radilar, ayniqsa kitoblardagi rasmlarni ota-onasining qadrdon ovozi jonlantirsa bormi?! Bu bola uchun har qanday kompyuter o'yiniyu multfilmdan a'loroq bo'ladi.

Hammamiz farzandlarimiz sog'lom fikrli insonlar bo'lishini istaymiz. Buning uchun mas'uliyatni his qilib, bolamiz salomatligi hamda ruhiyatining bardamligi haqida qayg'uraylik.

Loyihamiz rivojiga hissa qo'shing, arzimas 5 yoki 10 ming so'm va juda ko'p foydali darslar olishimizga va millionlab insonlarning hunar o'rganishiga sabab bo'la oladi!